Ministri i Punëve të Brendshme të Kosovës, Xhelal Sveçla, ka dhënë detaje në aksionin për gjetjen e tre personave që dyshohet se janë përmbysur mbrëmë në lumin Lepenc.
Sveçla ka thënë se pas koordinimit me autoritetet e Maqedonisë së Veriut, mbrëmë kanë arritur njësitet e para profesionale të Policisë së Kosovës dhe Forcës së Sigurisë, të cilët kanë filluar planifikimin dhe kërkimin në rrjedhën e rrëmbyeshme të Lepencit.
Ministri bëri me dije se aktualisht ndodhën 30 pjesëtarë të PK-së, FSK-së dhe vullnetarë profesionistë të kërkim-shpëtimit.
“Aktualisht ndodhen 30 pjesëtarë të Policisë së Kosovës, Forcës së Sigurisë së Kosovës dhe vullnetarë profesionistë të kërkim shpëtimit, të cilët në koordinim dhe bashkëveprim me ekipet profesionale të Maqedonisë së Veriut janë duke e bërë maksimumin e tyre në lokalizimin dhe nxjerrjen e personave nga lumi”, ka shkruar Sveçla në Facebook.
Ai tutje tha se institucionet vendore qëndrojnë pranë familjarëve në këto momente të vështira të aksidentit.
“Institucionet e Republikës së Kosovës në këto momente të vështira qëndrojnë pranë familjarëve të të prekurve nga ky aksident dhe përkundër të gjitha sfidave, kanë ngritur të gjitha kapacitetet që të kemi rezultate sa më të shpejta”./teve1.info/
