Laura Fazliu do të luftojë për medalje të bronztë në Grand Slamin e xhudos në Astana të Kazakistanit.
Laura po garon në kategorinë deri 63 kilogramë dhe është një fitore larg vendit të tretë.
Laura në xhiron e parë ishte e lirë e në xhiron e dytë e mposhti Esmigul Kuyulovan e Kazakistanit. Më pas zhvilloi luftë të fortë me jugkoreanen Jisu Kim. Gjyqtari, befasisht, ia dha shpejt dy dënime dhe kjo e kishte ndikimin e vet. Lufta shkoi në kohën shtesë, ndërsa Kim fitoi me Ippon.
Në repesazh, Laura e kaloi rusen Kamila Badurova, që garon si e pavarur.
Loriana Kuka në kategorinë deri 70 kg nuk kishte fat në short dhe u ndal në luftën e parë. Përballë e kishte holandezen me përvojë, Kim Polling.
Akil Gjakova garoi në kategorinë deri 73 kg. E mposhti fillimisht rusin Ayb Khazhaliev e më pas azerbajxhanasin Telman Valiyev. Humbi në çerekfinale nga Askar Narkulov i Kazakistanit e më pas në repesazh nga Zhansay Smagulov, po ashtu i Kazakistanit. Kështu përfundoi i shtati.
