Është dita e tretë që janë këtu.
Kamionët me mallra serbe nuk po lejohen të hyjnë në pikën kufitare në Merdarë.
Gjatë së premtes, shoferët e këtyre kamionëve u panë duke pritur afër kësaj pike kufitare, duke shikuar nëse lejohen apo jo të futen në Kosovë.
E kamionët dhe autobusët që po vijnë nga vende tjera, po qarkullojnë lirshëm pa ndonjë pengesë.
Edhe veturat po lëvizin lirshëm, veçse për këto të fundit Policia ka shtuar kujdesin ndaj tyre duke bërë kontrolle në detaje të tyre.
Televizioni ka tentuar të marrë përgjigje edhe nga Dogana e Kosovës, se a ka hyrë ndonjë mall serb në pikat tjera kufitare, por që nuk kanë qenë të qasshëm.
Vendimin për mbylljen e pikës kufitare për këto mallra, ekzekutivi e mori pas kidnapimit të tre policëve të Kosovës në Leposaviq.
Në një konferencë për media, kryeministri Albin Kurti të enjten tha se institucionet e sigurisë kanë shtrënguar kontrollet kufitare me Serbinë.
Ai mohoi të ketë ndalim të hyrjes së mallrave nga fqinji verior, teksa theksoi se masat nuk janë ekonomike apo tregtare, por që janë masa të sigurisë.
Serbia është një ndër pesë shtetet që eksporton më së shumti mallra në Kosovë, ku mesatarisht vlera e eksportit është një milionë euro në ditë.
Kronika e gazetarit Lindrit Zejnullahu.