Drejtori i Zyrës për Informim në Policinë e Kosovës, Baki Kelani në konferencë për medie ka thënë se është deklarim i rrejshëm i palës serbe se policët e arrestuar sot janë zyrtarë të njësive speciale.
Kelani tha se të arrestuarit janë zyrtarë kufitarë të moshës së shtyer mbi 50 vjeç, të cilët siç tha ai, kanë shërbyer për vite me radhë në Policinë e Kosovës.
“Ata janë tre zyrtarë policorë të moshës së shtyer mbi 50 vjeçar të cilët kanë shërbyer për vite me radhë në Policinë e Kosovës dhe ata kanë qenë në një pikë statike duke parandaluar krimin, kontrabandën dhe futjen e gjërave ilegale në territorin e Kosovës dhe një shfrytëzim të rrugëve që e ka penguar Serbinë, sepse ata dëshirojnë që përmes këtyre rrugëve ti realizojnë… “, tha ai.
Kelani theksoi se në territorin ku janë arrestuar zyrtarët policorë janë dërguar njësitë policore dhe është njoftuar KFOR-i, që të jetë në atë pjesë dhe ti kryejnë të gjitha detyrat bashkarisht.
Teksa theksoi se Policia e Kosovës është duke u koordinuar me KFOR-in dhe me gjithë mekanizmat ndërkombëtarë në mënyrë që zyrtarët policorë të kthehen sa më shpejtë në familjet e tyre.
“Jemi duke i koordinu të gjitha aktivitetet me KFOR-in dhe gjithë mekanizmat ndërkombëtarë që ti bëhet trysni Serbisë që pjesëtarët tanë të kthehen te familjet e tyre. Ne si Polici kemi thënë në vazhdimësi që grupe të caktuara kriminale të dirigjuara nga Serbia janë fut në Kosovë dhe kohë pas kohe kanë qëllime që të destabilizojnë Kosovën dhe ne jemi duke punuar në këtë drejtim. Mirëpo qëllimi i tyre është të parandalohen arrestimet e kriminelëve dhe të kalojnë në mënyrë ilegale lirshëm, dhe ne si Polici e Kosovës jemi u përkushtuar që të mos lejojmë një gjë të tillë. Këto veprime tregojnë që Serbia po përdor forma të ndryshme që ti realizojë qëllimet e saj. Rendi sundimi i ligjit kriminelët i pengon, mirëpo ne nuk do të zbrapsemi. Vet rasti tregon që duhet të rriten patrullimet dhe të shtohen forcat policore”, tha tutje ai./teve1.info./
