Të hënën, në rastin e njohur si “Stenta 1” Gjykata e Apelit ka shqyrtuar ankesën e Prokurorisë Speciale dhe përgjigjet e mbrojtjes në këtë ankesë.
Ndryshe, me 1 gusht 2022 Gjykata Themelore në Prishtinë kishte shpallur aktgjykim lirues për Ferid Aganin, ish-ministër i Shëndetësisë dhe Gani Shabanin, ish-sekretar i kësaj ministrie, të akuzuar për korrupsion në rastin e njohur si “Stenta 1”, raporton “Betimi për Drejtësi”.
Sipas gjykatëses referuese Afërdita Bytyqi, Prokuroria Speciale ka ushtruar ankesë mbi të gjitha bazat ankimore ndaj këtij aktgjykimi.
Ndërkaq, Prokuroria e Apelit përmes parashtresës ka propozuar që ankesa e PSRK-së të aprovohet si e bazuar dhe lënda të kthehet në shkallën e parë në rigjykim.
Në anën tjetër, përgjigje në ankesë kanë parashtruar mbrojtësit e të akuzuarit Agani dhe Shabani, avokatët Adem Vokshi dhe Skender Musa.
Të njëjtit, përmes përgjigjes në këtë ankesë kanë propozuar që ankesa e PSRK të hudhet si e pabazuar dhe të vërtetohet aktgjykimi i shkallës së parë.
Avokati Vokshi, ndër të tjera tha se pohimi i PSRK-së, se të akuzuarit në bashkëkryerje kanë kryer vepër penale ka qenë vetëm një dyshim i cili nuk ka mbështetje me asnjë provë relevante të besueshme të administruar nga ana e gjykatës së shkallës së parë në rigjykim.
Sipas tij, njëra ekspertizë ka vërtetuar se nuk ka asnjë shkelje procedurale as ligjore nga ana e të akuzuarve në rastin e aplikimit të shpërndarjes së mjeteve për subvencione.
Kurse, për ekspertizën financiare avokati Vokshi tha se ka vërtetuar se asnjë centë nuk është shpërdor më veprimet e të akuzuarit.
Po ashtu, i njëjti tha se ankesa e Prokurorisë përfshinë periudhën e cila nuk i përket kohës kur Ferid Agani ka qenë Ministër i Shëndetësisë.
“Përfshin periudhën deri në vitin 2015, ndërsa Ferid Agani ka qenë Ministër i Shëndetësisë deri me 09. 12. 2014, dmth 13 muaj më shumë akuzohet për kohën kur nuk ka qenë ministër në këtë kohë”, ka shtuar tutje avokati Vokshi./Betimi për Drejtësi/