Jeton Zulfaj, këshilltar politik i kryeministrit, Albin Kuri, tha se është shumë e padrejtë që kryetarët e zgjedhur në komunat veriore, të mos shkojnë në vendet e tyre të punës, vetëm pse ka kërkuar presidenti i Serbisë, Aleksandar Vuçiq.
“Të kërkohet tani që në fund të procesit, kur është njohur procesi, rezultati, betimi i kryetarëve, kryetarët të mos shkojnë në vendin e punës, sepse ashtu ka kërkuar presidenti i Serbisë, Aleksandar Vuçiq, kjo nuk duket e drejt dhe aspak fer, sepse objektet në këto katër komuna, janë asete të Republikës së Kosovës dhe janë aty për tu shërbyer kryetarëve”, deklaroi Zulfaj në emisionin “Këndi i Debatit”.
Njëherit, Zulfaj foli edhe për zgjedhjet e reja që pritet do të mbahen në veri.
“Në zgjedhjet e reja, gjasat janë minimale që të njëjtit kryetarë fitojnë, në rast se merr pjesë komuniteti serb”, theksoi Zulfaj në Tëvë1.
Ndërkaq, i pyetur për kritikat e ndërkombëtarëve karshi Qeverisë së Kosovës, Zulfaj vlerësoi se ato qortime ishin të padrejta.
“Mendojmë që nuk është e drejt të drejtohet gishti nga Qeveria për dërgimin e kryetarëve në vendin e tyre të punës. Ka pasur një proces zgjedhor, e që të cilin ndërkombëtarët e kanë njohur në çdo hallkë të tij”, shtoi tutje ai./teve1.info/.
