Kryeministri i Kosovës, Albin Kurti, ka thënë se kryetarët e komunave në veri të vendit duhet të jenë në objektet komunale.
Kurti ka përseritur qëndrimin e tij se Njësia Speciale do të vazhdojë të qëndrojë para objekteve të komunave “së paku deri të largohen bandat kriminale në veri”.
“Në këto tri komuna ne kemi tri objekte komunale dhe nëse jo kryetarët, kush duhet të jetë aty. Dhe nëse këto komuna nuk janë për kryetarët, për kënd janë? Kryetarët janë në zyrat e tyre, kështu duhet të jetë dhe të qëndrojë. Ata janë struktura ilegale të ndikuara nga Beogradi që duan ta destabilizojnë vendin tonë. Ne duam republikë demokratike, dhe në këto objektet ne mund ta zbusim numrin e policisë, por së pari bandat që kanë sulmuar gazetarët, policinë dhe KFOR-it duhet të shkojnë në Serbi ose në burg”, tha kryeministri në një intervistë në BBC Radio.
Kurti për presidentin e Serbisë, Aleksander Vuçiq tha se është autokratik.
“Unë nuk mund të bëj kompromis me republikën demokratike, duke qenë kryeministër i republikës më demokratike në Ballkan. Vuçiq është autokratik. Serbia nuk lejon serbët në Kosovë të kenë më shumë se një parti. Ministri serb Nenad Rashiq, nuk është në Listën Serbe, por është i urryer nga Lista Serbe”, tha Kurti.
Kryeministri është deklaruar se nuk do ta lejojë që Kosova të dëmtohet.
“Ne konsiderojmë Amerikën dhe BE-në, botën perëndimore si partner të padiskutueshëm. Por ne nuk mund të lejojmë që republika demokratike të bie në duart e milicisë fashiste, që kryesohen nga ministri i propagandës së Millosheviqit. Ata nuk janë distancuar nga Millosheviqi, nuk janë distancuar nga Putini, Serbia është e vetmja që nuk ka vendosur sanksione ndaj Rusisë. Disa mund të komplikojnë, por situata është e thjeshtë”, deklaroi ai.
Kurti është shprehur se dikur ka pasur struktura paralele të Serbisë, por sipas tij, ato janë struktura ilegale në listën e pagave të Beogradit.
“Shqiptarët janë 93 për qind e popullsisë sonë dhe ne kemi pakica të tjera të cilat janë të neglizhuara nga komuniteti ndërkombëtar romë, ashkali, egjiptianë, boshnjakë, goranë dhe turk. Dhe unë punoj me ta po ashtu. Dikur ka pasur struktura paralele të Serbisë, por ato janë struktura ilegale në listën e pagave të Beogradit që duan të destabilizojnë vendin tonë në kuadër të idesë së Beogradit për krijimin e ‘botës serbe’ ku doktrina kryesore është territoriale, etno-nacionaliste. Ne e kundërshtojmë atë”, tha i pari i qeverisë.
