Një deklaratë e raportueses për Kosovën në Parlamentin Evropian, Viola Von Cramon, shkaktoi reagime të shumta në Kosovë.
Të dielën gjatë vizitës që kishte në komunat veriore të Kosovës, iu drejtua policëve që po ruanin rendin atje me fjalët “Çka dreqin ju solli këtu, ku është kërcënimi?.
Një ditë më pas, ajo arsyetoi deklarimet e bëra.
Sipas saj, nuk është ajo që duhet sulmuar për këto deklarata por duhet shkuar në komunat veriore dhe të bisedohet me njerëzit atje.
“Pash një situatë që nuk ishte e duhur, kishte shkolla aty, kishte shtëpi banimi përreth dhe kishte njerëz të armatosur, si në luftë civile, në automjete të blinduara të cilët për të gjithë ne ishin absolutisht të papranueshme. Sigurisht që duhet të pyes “çfarë po bëni këtu”. E di se nuk është faji i juaj, e di se nuk ndjeheni rehat, megjithatë e bëra këtë pyetje” kishte deklaruar eurodeputetja.
Megjithatë, njohësi i çështjeve politike, Albinot Maloku thotë se çasja e saj është e papritshme për pozicionin që ajo ka.
“Raporturesja Cramon pati një çasje jashtëzakonisht jo qytetare ndaj zyrtarëve policorë të shtetit të Kosovës. Çasja e Bashkimit Evropian për Kosovën rregullisht ka qenë dyfytyrësi dhe unë për këtë nuk kam pasur kurrë dyshime. Për faktin e mosunitetin të këtij mekanizmi ndërkombëtar të quajtur BE. Ndërsa sa i përket reagimeve të tjera nga faktorët ndërkombëtar janë edhe si pasojë e hapave jo të mençur të qeverisë aktuale”, vlerëson Maloku.
Por qëndrim të ndryshëm ka njohësi i çështjeve të sigurisë, Bedri Elezi.
“Kishte reaguar për shkak të rrezikut që mund të eskalojë situata e sigurisë dhe mundësisë që Beogradi zyrtar të përdor këtë lloj situate për të tentuar që të përplasen me forcat ndërkombëtare në kufi të Republikes së Kosovës”, tha Elezi.
Çasjen e Von Cramon nuk e panë si të denjë, madje edhe e kritikuan ashpër në mënyrë ironizuese edhe figura të tjera politike.
