Flamuri i Kosovës nuk po shfaqet në Botërorin e atletikës që po mbahet në Beograd të Serbisë. Por as në faqen e Federatës Ndërkombëtare të Atletikës.
Gresa Bakraqi ishte atletja e vetme që e përfaqësoi Kosovën në Botërorin në Beograd. Bakraqi garoi të premten në 1500 metra vrapim. Megjithatë, flamuri i Kosovës nuk ishte shfaqur në monitorin gjigant në “Stark Arena” kur ajo garoi në baterinë e dytë. Po ashtu edhe në uniformë të veten Gresa e kishte të mbuluar flamurin.
Flamuri i Kosovës po ashtu nuk është përfshirë në faqen zyrtare të Federatës botërore të Atletikës te rezultatet, madje as të shtetët pjesëmarrëse.
Por sipas KOK-ut, organizatori dhe Federata Botërore e Atletikës kanë marrë vendim që mos të shfaqet asnjë simbol i Kosovës në këtë garë.
“Gresa u përfaqësua me inicialet KOS në fanellë, njësoj si të gjitha pjesëmarrëset tjera. Shkaku i Kosovës organizatori dhe Federata Ndërkombëtare e Atletikës, kishin vendosur që asnjë flamur i ndonjë shteti pjesëmarrës të mos shfaqet në stadium. Diskriminimi i vetëm erdhi nga regjia serbe, e cila nuk shfaqi flamurin e Kosovës tek emri i garueses, por vetëm shkurtesën KOS, duke dëshmuar edhe një herë se politika serbe ende përzihet në sport, çka për ne është e papranueshme. Në lidhje me këtë, KOK së bashku me Federatën Atletike të Kosovës janë ankuar menjëherë në Federatën Ndërkombëtare të Atletikës dhe në Komitetin Olimpik Ndërkombëtar”, u tha nga KOK-u.
/Tëvë1/
