Në një postim në Facebook nga Ministria e Industrisë, Ndërmarrësisë dhe Tregtisë (MINT) bëhet e ditur se Inspektorati ka hasur në mospërputhje të çmimeve raftë-arkë, me ç’rast ka marrë edhe masa ndëshkuese, shkruan teve1.info
“Gjatë inspektimeve të ditës së shtunë, Inspektorët e Tregut kanë hasur në parregullsi sa i përket mospërputhjes së çmimeve raftë –arkë, mashtrimit lidhur me zbritjet e reklamuara dhe në disa produkte ka munguar deklaracioni në gjuhën shqipe, prandaj në secilin rast janë marrë masa ndëshkuese në pajtim me ligjet në fuqi”, thuhet në njoftim.
MINT ka falënderuar konsumatorët që vazhdojnë të adresojnë ankesat e tyre në Departamentin për Mbrojtjen e Konsumatorit dhe në të njëjtën kohë ka shtuar se Inspektorati i Tregut do vazhdojë inspektimet në tërë Kosovën.
“Në të njejtën kohë i siguron konsumatorët se Inspektorati i Tregut do të jetë aktiv në interes të mbrojtjes së konsumatorëve, eliminimit të praktikave të padrejta tregtare, mbrojtjen e konkurrencës së drejtë dhe në bashkëpunim me inspektorët e tregut në komuna, do të vazhdojë inspektimet në tërë Kosovën dhe në çdo rast kur konstatohen parregullsi, do të merren masa ndëshkuese në pajtim me ligjet në fuqi’, thuhet në postimin e MINT në Facebook. /Teve1.info/
