Presidentja e Kosovës, Vjosa Osmani ka kujtuar 24-vjetorin e Masakrës në qytetin e Vushtrrisë.
Ajo ka thënë se shfarosja dhe spastrimi etnik nga regjimi i Serbisë u manifestuar edhe më 22 maj të vitit 199.
“Përpjekja për shfarosje dhe spastrim etnik nga regjimi gjenocidal i Serbisë u manifestua edhe më 22 maj të vitit 1999, kur nga shtëpitë e tyre u dëbuan me dhunë banorët e rrugës që në atë kohë mbante emrin “Abdullah Shabani” në Vushtrri. 68 prej tyre, në mesin e të cilëve edhe fëmijë dhe pleq u ndaluan në shtëpinë e Kahriman Pasomës dhe pas torturave barbare u ekzekutuan mizorisht. Pas përfundimit të luftës, trupat e shumicës së të vrarëve janë gjetur në varrezën masive në Batajnicë të Serbisë, me qëllim që të humben gjurmët e krimit. Ndërkaq banorë të tjerë të kësaj lagjeje, i kanë grumbulluar te varrezat e qytetit dhe pasi që i kanë plaçkitur, një pjesë i kanë vendosur dhe torturuar në sallën e sportit, të tjerë në burgun e Smrekonicës, teksa një pjesë i kanë dëbuar për në Shqipëri”, ka thënë Osmani në kujtim të kësaj masakre.
Ajo ka thënë se liria do të kenë kuptim kur drejtësia për viktimat të vihet në vend.
“Liria dhe paqja do të kenë kuptim kur drejtësia për viktimat të vihet në vend. Kujtim dhe nderim i përhershëm për martirët, sikurse edhe angazhim i pareshtur për ndëshkimin e këtij krimi duke sjellë autorët para drejtësisë”, ka thënë Osmani./teve1.info/