Presidenti serb, Aleksandar Vuçiq ka thënë se nuk ndihet i lumtur që edhe presidentja e Kosovës, Vjosa Osmani është pjesëmarrëse në ceremoninë e inaugurimit të homologut të tyre malazez, Jakov Milatoviq.
Ai tha se mori pjesë vetëm për shkak të “respektit” që ka për Malin e Zi.
“Nuk jam i lumtur për këtë, pasi e dini se çfarë shkruhet në Kushtetutën e Serbisë. Jo sepse kam diçka personale kundër saj, por për çdo gjë tjetër. Por gjithsesi erdha. Nëse me të vërtetë po pyet për çështjet e protokollit, diku kam ardhur dhe diku jo. Ju do ta shihni atë. Doja të tregoja respekt dhe sa e rëndësishme është për ne të kemi një mik të vërtetë në Mal të Zi. Çdo përparim është jashtëzakonisht i rëndësishëm për ne. E kuptova Milatoviqin se ai dëshiron të forcojë lidhjet ekonomike dhe ne të dy jemi në rrugën europiane. Kemi disa dallime, jo vetëm në rajon, por kjo nuk duhet të jetë pengesë për marrëdhëniet miqësore. Nganjëherë do të guxoja të them marrëdhënie vëllazërore”, ka thënë Vuçiq shkruan novosti.rs.