Analisti dhe publicisti nga Mitrovica, Nexhmedin Spahiu, ka thënë se betimi i kryetarit në veri të Mitrovicës duhet të bëhet me ngritjen e flamurit të Kosovës para objektit të komunës dhe brenda sallës.
Spahiu tha se nëse bëhet një gjë e tillë, atëherë ky do të jetë një mesazh për serbët për vendosmërinë e institucioneve të vendit.
Ai në emisionin “InfoNata” në Tëvë 1, tha se nëse betimi i kryetarit Erden Antiq bëhet pa problem, puna e institucioneve do të vazhdojë.
“Nëse nesër bëhet betimi para flamurit të Kosovës në sallë dhe i vendosur jashtë objektit të komunës, atëherë këtë serbët do ta kuptojnë si vendosmëri të institucioneve për t’i shkuar deri në fund dhe puna e institucioneve në veri do të jetë më pa telashe, nëse të premten nuk ka telashe. Nëse nesër nuk do të ngritet flamuri i Kosovës ose ngritet në sallë, por jo jashtë komunës, kjo do të jetë sinjal te serbët se institucionet janë të frikësuara dhe rreziku do të jetë më i madh”, ka thënë Spahiu.
Ai ka thënë se Vuçiq do të kërkojë shpalljen e zgjedhjeve të reja dhe kryeministri Kurti mund ta pranojë nën presionin e ndërkombëtarëve.