Kreu i Partisë Demokratike të Kosovës, Memli Krasniqi me rastin e Ditës Ndërkombëtare të Muzeut ka thënë se një popull i cili muzeon, nuk harron.
Përmes një postimi në Facebook, ai ka thënë se muzetë përveç rolit të tyre primar në ruajtjen e thesareve të çmueshme që reflektojnë pasurinë kulturore dhe historike të një populli, janë edhe qendra të mirëfillta edukimi e frymëzimi, shkruan teve1.info
“Muzetë, përveç rolit të tyre primar në ruajtjen e thesareve të çmueshme të cilat reflektojnë pasurinë kulturore dhe historike të një populli, sot, janë edhe qendra të mirëfillta edukimi e frymëzimi. Një popull i cili muzeon, nuk harron. E, harresa, para se gjithash, është hap drejt ripërsëritjes”, ka shkruar Krasniqi në Facebook.
Madje, ai ka inkurajuar qytetarët që të ndajnë kohë për të vizituar një muze sot.
“Muzeoni, memorizoni, e zbuloni faktet dhe mrekullitë që ruajnë muzetë tona”, ka shkruar kreu i PDK-së.
Ndryshe, komuniteti i muzeve në mbarë botën shënon sot Ditën Ndërkombëtare të Muzeut. Dita Ndërkombëtare e Muzeut u jep mundësinë profesionistëve të muzeve të takojnë njerëz dhe t’i informojnë ata rreth sfidave me të cilat përballen muzetë.
Çdo vit, muzetë nga e gjithë bota janë të ftuar të marrin pjesë në Ditën Ndërkombëtare të Muzeut për të promovuar rolin e muzeve në të gjithë botën, duke krijuar veprimtari unike, falas dhe argëtuese rreth një teme që diskutohet në mënyrë specifike për këtë ditë të veçantë./teve1.info
