Lëvizja Vetëvendosje, ka thënë se Kosova është bërë pjesë e programit të Bashimit Evropian “Tregu i Përbashkët”, dhe kështu përfiton nga fondi 4.2 miliardë euro.
Sipas VV-së, përmes këtij programi bizneset dhe organizatat e Kosovës mund të ndërveprojnë me bizneset dhe organizatat e shteteve anëtare të Bashkimit Evropian dhe shteteve në proces të anëtarësimit në BE.
“Ky program do të mbështesë sektorët e ndërmarrjeve mikro, të vogla dhe të mesme me një buxhet prej 4.2 miliardë euro për periudhën kohore 2021-2027, e që nga tani bizneset dhe organizatat vendore mund të përfitojnë nga ky program”, thuhet në njoftimin e postuar në Facebook.
Ndërsa, lidhur me këtë ka reaguar deputetja e Lidhjes Demokratike të Kosovës, Hykmete Bajrami, duke e quajtur propagandë.
“Sa i përket 4.2 mld. eurove për të cilat po propagandon LVV, qe dy fakte: e para, ato nuk janë vetëm për Kosovën, dhe e dyta, më e rëndësishmja, Kosova edhe më herët ka qenë pjesë e programeve të BE-së – menjëherë pas nënshkrimit të MSA-së, të cilën VV nuk e ka votuar”, ka shkruar deputetja në Facebook.
Sipas saj, MSA ka qenë parakusht që Kosova të bëhet pjesë e programeve të BE-së, por që pushteti i sotëm në atë kohë nuk i ka njohur si në rastin e letër së Mogherinit.
“Programi i Tregut të Përbashkët (Single Market Programme) sot, është programi COSME dikur. Këtë program Kosova e ka dakordu me BE-në në vitin 2017. I njëjti është ratifiku në 2017 dhe ka hyrë në fuqi në 2018”, ka shkruar ajo tutje. /teve1.info/
