Agjencia e Metrologjisë së Kosovës së bashkë me Krimet Ekonomike kanë zhvilluar sot një aksion në një pikë karburanti në Vushtri, ku janë hasur disa shkelje.
Sipas Ministrisë së Industrisë, Ndërmarrësisë dhe Tregtisë, në këtë pikë e cila gjendet në rrugën “Faruk Beqiri” në tri dorezat e shpërndarësit të derivateve ka pasur shmangie të konsiderueshme të sasisë.
“Pas verifikimit të katër dorezave të produkteve të naftës, është konstatuar se ka pasur shkelje si në vijim:
-Këputje të bllombës zyrtare, tek doreza ( 2A) të mjetit matës, i cili është vënë në funksion të keqpërdorimit, nga operatori ekonomik.
-Në tri dorezat e tjera të verifikuara të shpërndarësit të derivateve të naftës, ka shmangie të konsiderueshme të sasisë”, thuhet në njoftim e MINT.
Tutje bëhet e ditur se procedimi i mëtutjeshëm i rastit në fjalë, vazhdon përmes organeve kompetente.