Kryetari i Aleancës për Ardhmërinë e Kosovës, Ramush Haradinaj, ka kujtuar betejën e zhvilluar më 12 maj 1998 në Ratkoc, Vrajakë, Bratotin e Malësi të Vogël.
Përmes një postimi në Facebook, Haradinaj ka shkruar se nga kjo betejë u shënua një kapitull i ri për luftën çlirimtare në Zonën Operative të Pashtrikut.
“Beteja e zhvilluar më 12 maj 1998 në Ratkoc, Vrajakë, Bratotin e Malësi të Vogël, shënoi një kapitull të ri për luftën tonë çlirimtare në Zonën Operative të Pashtrikut. Atë ditë ranë heroikisht; Milaim Krasniqi dhe Elmi Morina. Një vit më pas, ra dëshmor një nga luftëtarët më të zotë të UÇK-së në rrethin e Anadrinisë, Bedrush Gashi. Me të drejtë, 12 maji shënohet si Ditë e Dëshmorëve në Komunën e Rahovecit. Po ashtu në të njëjtën datë, më 1998, u përjetësua udhëheqësi i njësiteve të hershme guerile të UÇK-së, Agron Rrahmani. Agroni që u vu në ballë të organizimit të Luftës Çlirimtare, mbetet përgjithmonë shembull qëndrese dhe atdhedashurie”, thuhet në postimin e Haradinaj.
Derisa në përmbyllje, Haradinaj ka thënë se respekti dhe mirënjohja për sakrificën e tyre, do të jetë i përhershëm.
“Lavdi të gjithë atyre që luftuan dhe ranë për lirinë e Kosovës!”, ka shkruar tutje./teve1.info/.