Zëvendëskryeministri i parë për Integrim Evropian, Zhvillim dhe Dialog, Besnik Bislimi gjatë raportimit në Komisionin parlamentar për Integrim Evropian tha se rasti i ambasadorit të Kosovës në Kroaci, Martin Berishaj është konstrukt artificial i ndërtuar nga partitë opozitare në Kosovë.
Sipas Bislimit ndaj ambasadorit Berishaj nuk ka asnjë rast gjyqësor ndaj të gjitha këto janë spekulime dhe sipas tij, opozita mund të vazhdoj me këto deklarime për ndonjë poenë politikë.
Ndërsa Rrezarta Krasniqi nga LDK ,tha se raporti i DASH-it ka dëshmuar të kundërtën e asaj që thotë qeveria për luftimin e korrupsionit duke përmendur pikërisht rastin e ambasadorit Berishaj dhe tashmë të kryeshefit të pezulluar të KEK-ut, Nagip Krasniqi.
Sa i takon arrestimit të ish-kryeshefit të KEK, Nagip Krasniqi, Bislimi tha se Këshilli Prokurorial i Kosovës nuk po merret me 30 rastet e dorëzuara nga menaxhmenti i KEK-ut, por me Krasniqin sepse KEK si ndërmarrje publike ka shënuar përparim dhe mjetet e dala nga kjo ndërmarrje nuk kanë shkuar tek politikanët dhe as në jahte.
Ndryshe ish-kryeministri slloven, Janez Jansha, ka bërë një reagim lidhur me arrestimin e drejtorit të Korporatës Energjetike të Kosovës, Nagip Krasniqi, i cili dyshohet për keqpërdorim të pozitës, ushtrimit të ndikimit dhe konflikit të interesit.
Këtë rast, ish-kryeministri slloven e ndërlidh me hetimet në rastin e ambasadorit të Kosovës në Kroaci, Martin Berishaj, i cili dyshohet për shpëlarje parash, shkruan teve1.info.
Jansha ka thënë se arrestimi i drejtorit të KEK-ut është bërë si rezultat i gjetjeve në hetimin Berishaj – GEN-i dhe Golob.
Kurse Berishaj përmes një shkrimi ka thënë se nuk është pronar apo aksionar i ndonjë kompanie në Kosovë, apo në vend tjetër.
Ai i ka hedhur poshtë pretendimet se ka fshehur apo deklaruar rrejshëm pasurinë.
