Ministri i Mbrojtjes, Armend Mehaj, ka takuar Ministrin e Mbrojtjes së Italisë, Guido Crosetto, me të cilin folën rreth bashkëpunimit në fushën e mbrojtjes, edukimit dhe trajnimit të ushtarakëve në fusha specialistike, forca speciale, aviacion e mjekësi.
Përmes një postimi në Facebook, Mehaj ka thënë se ka falënderuar ministrin Crosetto, për mbështetjen e deritanishme nga shteti italian, derisa ka theksuar se do të vazhdojnë thellimin e bashkëpunimit mes Kosovës dhe Italisë, përcjell teve1.info.
“Gjatë vizitës zyrtare në Itali, takova Ministrin e Mbrojtjes të Republikës së Italisë, Guido Crosetto, me të cilin diskutuam rreth bashkëpunimit në fushën e mbrojtjes, edukimit dhe trajnimit të ushtarakëve tanë në fusha specialistike, forca speciale, aviacion e mjekësi. Falenderova ministrin për mbështetjen e deritanishme ofruar nga shtetit italian, ndërsa do vazhdojmë thellimin e këtij bashkëpunimi që është në funksion të ruajtjes së paqes dhe stabilitetit të gjithmbarshëm. Ndërsa shpreha edhe njëherë gatishmërinë në ofrimin e trajnimeve në fushën e kërkim-shpëtimit urban, deminimit dhe eliminimit të materieve të rrezikshme”, thuhet në postimin e Mehaj.
Njëherit, Mehaj ka bërë të ditur se kanë biseduar edhe për situatën aktuale gjeopolitike, luftën në Ukrainë dhe rëndësinë e unitetit për mbështetjen e ukrainasve në luftën kundër agresorit rus.
Derisa ka shtuar që Kosova mban qëndrim të qartë kundër politikave ruse.
“Në këtë aspekt bëra të ditur se Kosova mbanë qëndrim të qartë kundër politikave ruse, dhe në vazhdimësi si pjesë e Grupit të Kontaktit për Mbrojtjen e Ukrainës, jemi duke ofruar gjithçka që është e mundshme brenda kapaciteteve tona, duke përfshirë pranimin e refugjatëve si dhe integrimin e gazetarëve ukrainas në Kosovë dhe po ashtu ofrimin e trajnimeve me instruktor specialist të Qendrës Ndërkombëtare të Kërkim-Shpëtimit”, ka theksuar Mehaj./teve1.info/.
