Kryetari i Prishtinës, Përparim Rama ka njoftuar qytetarët se po formohet Drejtoria e Policisë së kryeqytetit.
Ai në Facebook ka thënë se sot ka takuar drejtorin e Përgjithshëm të Policisë së Kosovës, Gazmend Hoxha, teksa theksoi se në takim u diskutua për formimin e kësaj Drejtorie.
“Sot takova Drejtorin e Përgjithshëm të Policisë së Kosovës, Gazmend Hoxha, dhe bashkëpunëtorët e tij. Takimi, përveç se ishte njoftues me Drejtorin e ri, kishte edhe një qëllim jashtëzakonisht të rëndësishëm për Kryeqytetin dhe qytetarët tanë, pra formimin e kësaj Drejtorie. Kjo strukturë do të jetë në shërbim të qytetarëve, dhe do të ndihmojë në adresimin e çështjeve të sigurisë në #Kryeqytet”, tha Rama.
Tutje i pari i kryeqytetit tha se rendi dhe siguria e të gjithë qytetarëve është prioritet.
“Unë u zotova se do të ndërtojmë marrëdhënie të ngushta e të shëndosha bashkëpunimi me këtë Drejtori. Rendi dhe siguria e të gjithë qytetarëve është prioritet”, shtoi ai./teve1.info./