Klisman Kadiu, këshilltar politik i zëvendëskryeministrit Besnik Bislimi, ka vlerësuar se vendimi i Qeverisë së Kosovës për ekipin menaxhues, nuk është në kundërshtim me marrëveshjen.
Madje sipas tij, zëdhënësi i BE-së, Peter Stano, nuk ka njohuri për atë që po zhvillohet në procesin e dialogut, përcjell teve1.info.
“Vendimi i Qeverisë së Kosovës për ekipin menaxhues, nuk është në kundërshtim me marrëveshjen. Nga deklarata e zëdhënësit të BE-së, vihet re se ka minimum të njohurisë për atë që po zhvillohet në procesin e dialogut, por maksimum gatishmëri në nxjerrjen e deklaratave kundër Kosovës. Gatishmërinë e njëjtë, duhet ta ketë kur ka shkelje aktuale të marrëveshjes, si përshembull vota kundër e Serbisë në Këshillin e Evropës, për të cilën po gjendet në vështirësi kur përgjigjet. Apo edhe për shkeljet e tjera që Serbia po ia bën marrëveshjes”, ka shkruar Kadiu në Facebook.
Kadiu ka shtuar se pas prezantimit të draft statutit nga Ekipi Menaxhues, nuk ka më asnjë rol diskutimi.
“Ekipi Menaxhues e ka pasur vetëm një mision apo detyrë, i cili ka qenë përgatitja dhe prezantimi i draftit të statutit. Pas këtij prezantimi, nuk ka më asnjë rol sepse diskutimi tashmë është politik”, thuhet tutje në postimin e tij./teve1.info/.