Një grabitje e armatosur ka ndodhur gjatë ditës së sotme në një institucion mikrofinanciar në Prishtinë. Lajmin për teve1.info e ka konfirmuar edhe zëdhënësja e policisë për rajonin e Prishtinës, Flora Ahmeti.
Ahmeti ka thënë se Policia e Kosovës ka dalë menjëherë në vendin e ngjarjes, dhe dyshohet se një person nën kërcënimin e armës ka grabitur një shumë parash.
“Sot rreth orës 14:00 është raportuar për një grabitje të ndodhur në një institucion mikrofinanciar në rrugën “Nazim Gafurri”në Prishtinë. Pas marrjes së informacionit policia ka dalë në vendngjarje dhe bazuar në informacionet e para, dyshohet se një personi i dyshuar nën kërcënim të armës ka grabitur një shumë parash”, ka thënë Ahmeti për teve1.info
Tutje, Ahmeti ka bërë të ditur se në lidhje me rastin policia ka nisur një hetim për zbardhjen e rastit.
“Policia ka iniciuar një hetim lidhur me rastin dhe ka nisur me ndërmarrjen e veprimeve të nevojshme policore me qëllim zbardhjen e rrethanave të rastit si dhe identifikimin dhe arrestimin e personit të dyshuar”, shtoi ajo.
