Ministri i Financave, Punës dhe Transfereve, Hekuran Murati, tha se shpenzimet për mëditje dhe udhëtime zyrtare, këtë vit janë përgjysmuar.
Këtë deklaratë Murati e dha pasi kreu i AAK-së, Ramush Haradinaj, gjatë diskutimit në Kuvend, tha se në këtë periudhe është rritur “vetëm luksi qeveritar”.
Njëherit, Murati tregoi arsyet pse janë rritur shpenzimet tek kategoria e mallrave dhe shërbimeve.
“Sa i përket shpenzimeve për mëditje apo udhëtime zyrtare, janë përgjysmuar. Mirëpo, arsyet pse janë rritur shpenzimet tek kategoria e mallrave dhe shërbimeve, ka të bëjë kryesisht me rritjen e shpenzimit për barnat esenciale, ka të bëjë me rritjen e shpenzimit të rezervës shtetërore që vitin e kaluar ka qenë 10 milionë euro, ndërsa në këtë vit është 15 milionë euro. Pastaj, ka mirëklasifikim të keqklasifikimeve të mëhershme, për shembull, shpenzimet e mirëmbajtjes si dhe normalisht ka shpenzime për çështje të sigurisë, siç është municioni, apo pajisje dhe furnizime të tjera”, deklaroi Murati para deputetëve në Kuvend.
Derisa në fund, Murati tha se buxheti për paga ka rritje në nivelin prej 16 përqind./teve1.info/.
