Përmes një aktiviteti, Departamenti Gazetarisë në Universitetin e Prishtinës, shënoi 3 majin, ditën botërore të lirisë së shtypit.
Aty u fol për rëndësinë që ka liria e shprehjes.
Dekanja e Fakultetit Filologjik, Lindita Rugova, përmendi rëndësinë që ka të shprehurit lirshëm në demokraci.
‘Liria e shprehjes është e garantuar me demokraci, nëse nuk mund të flasim lirshëm do të thotë se po na kufizohet e drejta jonë. Të flasësh lirshëm është pjesa qenësore e një shoqërie dmeokratike. Sidoqoftë, vlen të përmendet se edhe liria e shprehjes ka limite, varësisht nga konteksti specifik që përmban”, tha Rugova.
Ndërkaq profesoresha e Departamentit të Gazetarisë, Remzie Shahini-Hoxhaj, si problem modern sa i përket informimit, e veçoi programin Chat-GPT.
E Shkëlzen Osmani nga platforma për verifikimin e lajmeve të rreme “HIBRID” konsideron se liria e shprehjes edhe po keqpërdoret.
Prezente në këtë organizim ishin edhe dy gazetare të huaja, të cilat janë strehuar në Kosovë.
Bëhet fjalë për Lydmila Makey, gazetare nga Ukraina, vendi i së cilës është në luftë, si dhe Amina Omid, gazetare nga Afganistani, shtet ky që u mor në qeverisje nga talebanët.
“Të paktën 56 gazetarë u vranë dhe të tjerë edhe u burgosën nga shteti rus vetëm për të parandaluar popullin ukrainas që të ketë akses në lajme dhe informacione. Pra në mënyrë që të mos pasqyrohen krimet dhe vrasjet që agresioni rus po bën. Ky është cmimi që Ukraina po e paguan për lirinë e saj dhe të drejtën për të ekzistuar”, tha Makey.
“Jemi të lumtur të festojmë këtë ditë, por në anën tjetër ndihem shumë e pikëlluar. Kur mendoj për vendin tim dhe njerëzit ku unë përkas, nuk ka kurrfarë lirie, madje as për jetën e përditshme. Ne mundohemi të paktën të ngrisim zërin pë rata që nuk mundën”, u shpreh Omid.
Në përmbyllje të këtij organizimi, foli edhe rektori i Univeristetit të Prishtinës, Qerim Qerimi.
Ai përgëzoi punën e profesorëve të Departamentit të Gazetarisë që po bëjnë se bashku me studentët.
Derisa kujtoi dhe punën e tij të parë që e ka bërë si gazetar, si dhe rëndësinë që ka ky profesion.
Kronika e gazetares Valëza Sylejmani.
