Ka përfunduar seanca me dëgjimin e dëshmitarit të gjashtë të Zyrës së Prokurorit të Specializuar ndaj Pjetër Shalës.
Anëtarët e trupit gjykues kanë pyetur dëshmitarin që mban numrin 11 për deklaratat e tij në lidhje me personat që po mbaheshin në fabrikën e Metalit në Kukës.
“U liruan disa prej personave nga kjo dhomë gjatë kohës që ishit ju të ndaluar dhe a sollën të sndaluar të tjerë gjatë kësaj kohe?”, pyeti gjykatësi Gilbert Bitti.
“Jo, nja dy kanë dalë, të tjerë nuk kam vërejtur. Ndoshta para meje ka pasur, nuk e di”, është përgjigjur dëshmitari”, tha dëshmitari që mban numrin 11.
Tutje gjykatësi tha se në deklaratën e mëparshme, dëshmitari ka thënë se gjatë kohës sa ishte i ndaluar erdhën disa të burgosur të rinj dhe disa të tjerë u larguan.
“A ju kujtohet nëse kishte një ndërrim të të burgosurve, sa veta ju kujtohet, sa veta janë larguar dhe sa kanë ardhur? A ju kujtohet?”, pyeti gjykatësi Gilbert Bitti.
“Jo, nuk më kujtohet”, u përgjigj dëshmitari 11.
Po ashtu, dëshmitari tha se nuk ka qenë në njohuri se çfarë po ndodhte me të ndaluarit tjerë kur nxirreshin jashtë dhe ka mohuar se ka dëgjuar zëra apo të bërtitura nga ta.
Sipas tij, pasi ktheheshin nga intervistimi të ndaluarit, kishin frikë t’i shikonin dhe se nuk kishte vërejtur shenja në trupat e personave që po mbaheshin të ndaluar në fabrikën e metalit në Kukës.
Ky është dëshmitari i gjashtë i mbrojtur i ZPS-së kundër Pjetër Shalës i cili po përballet me akuza me pretendime për krime lufte.
Pjetër Shala e ka ndjekur këtë seancë përmes video-lidhjes nga Qendra e Paraburgimit.
Kronika e gazetarit Lindrit Zejnullahu.
