Tek çështja e Asociacionit u tha se do të ketë edhe takime tjera, mirëpo deputeti i pavarur, Haki Abazi, tha se duke u bazuar nga ngjarjet e fundit, Kosova nuk ka më fare hapësira për të manovruar para Bashkimit Evropian.
Se cila duhet të jetë zgjedhja e radhës nga Qeveria, deputeti Abazi dha dy opsione.
“Pas këtyre sekuencave të ngjarjeve, hapësira për të manovruar para Bashkimit Evropian, është pothuajse jo ekzistente. Nëse insistimi i Bashkimit Evropian, që zbatimi i marrëveshjes fillon me themelimin e Asociacionit i bie që kemi vetëm dy rrugëdalje. E para rrugëdalje është që të zbatojmë krejt çka na kërkohet, me çkado që është e mundur për ta kërkuar garancionin që s’paku të mos preket rendi kushtetues i vendit, e që do të jetë shumë e vështirë në këtë proces. Apo, rrugëdalja e dytë edhe kthimi i Kurtit tek qytetarët, ose pranimi i faktit që nuk mundemi më”, deklaroi Abazi në emisionin “Këndi i Debatit”.
Kryeministri Albin Kurti, pas takimit në Bruksel, tha se draft-statuti i prezantuar nga ekipi menaxhues në takim me presidentin serb, Aleksandar Vuçiq, ka qenë fundamentalisht i papajtueshëm me Kushtetutën e Kosovës.
Më tej, Kurti ka treguar se ka propozuar një draft të cilin ai e ka quajtur “draft-vizion” mbi kornizën që rregullon çështjen e komuniteteve joshumicë në Kosovë./teve1.info/.