Dushan Janjiq nga Forumi për Marrëdhënie Etnike thotë se kriza në Kosovë nuk do të zgjidhet shpejt, por do të vazhdojë për një kohë të gjatë.
“Gjëja më e rëndësishme për mbijetesën e paqes së paqëndrueshme është zgjidhja e problemit të paramilitarëve, krimit, lirisë së lëvizjes dhe lëvizjeve të njëanshme”, theksoi Janjiq për N1, transmeton teve1.info.
Duke folur për takimin e djeshëm në kuadër të dialogut, thotë se u prezantua një udhërrëfyes për kthimin e serbëve në institucione.
“Siç e dëgjuam nga presidenti Vuçiq, nuk ka pasur marrëveshje për këtë, por ai është i gatshëm të ulet sërish me Kurtin pas tre-katër ditësh dhe të bisedojnë. Por le të jemi direkt – po flasim se si të dalim nga vakuumi institucional dhe i sigurisë që u krijua kur Lista Serbe u largua nga institucionet”, tha Janjiq.
Tutje ka theksuar se derisa po vazhdojnë bisedimet për kthimin e serbëve në institucionet gjyqësore dhe politike, po ndërrohen flamujt në stacionet policore dhe po hapet ura.
“Hapja e urës ndërmjet Mitrovicës veriore dhe jugore ishte paraparë më herët, por nuk ishte koha e duhur. Ajo ka një kuptim më simbolik dhe një kujtim të disa kohëve të tmerrshme”, tha Janjiq, duke shtuar se kjo situatë mund të përdoret nga paramilitarët “nëse ata në anën serbe ekzistojnë”.
Janjiq deklaroi se Vuçiq dhe Kurti po ndjekin një politikë zvarritjeje, si dhe se “të dy po blejnë kohë”.
Ai shtoi se është e nevojshme të zhvillohen zgjedhje të reja në Kosovë me pjesëmarrjen e serbëve për të normalizuar situatën.