Gjykata Themelore në Prishtinë, e ka aprovuar kërkesën e Prokurorisë Speciale të Republikës së Kosovës (PSRK-së), për vazhdimin e masës së paraburgimit edhe për dy muaj ndaj Dibran Hoxhajt i njohur si “Kobra” dhe katër të tjerëve, të dyshuar për vrasjen e personit nga Kukësi me inicialet V.C.
Kjo është konfirmuar nga zyrtarja për informim e kësaj gjykate, Mirlinda Gashi.
“Departamenti Special i Gjykatës Themelore në Prishtinë ka aprovuar kërkesën e Prokurorisë Speciale të Republikës së Kosovës, për vazhdimin e masës së paraburgimit kundër të pandehurve D.H, A.V,B.M dhe J.B, ashtu që masa e paraburgimit i është vazhduar edhe për 2 (dy) muaj, e cila masë do të llogaritet prej datës 03.05.2023 deri më datën 03.07.2023, ndërsa për të pandehurin R.S, masa e paraburgimit do ti llogaritet prej datës nga data 06.05.2023 deri më datën 06.07.2023”, ka deklaruar ajo për teve1.info.
Kujtojmë se ngjarja ku V.C mbeti i vrarë, ndodhi më 3 janar të këtij viti, në një klub nate në Prizren, pronar i së cilës është Dibran Hoxhaj. Ndërkaq një person tjetër mbeti i plagosur.
Shkak i tërë kësaj ngjarje dyshohet të jetë një faturë prej 400 eurosh të cilët klientët, V.C me shokë, e kishin cilësuar si të padrejtë.