Drejtori i së ashtuquajturës Zyrës për Kosovën në Qeverinë e Serbisë, Petar Petkoviq, ka thënë se kryeministri Albin Kurti në takimin e djeshëm në Bruksel nuk e ka dashur formimin e Asociacionit të Komunave me shumicë serbe, nuk do bisedime, është njeri që nuk dëshiron paqe por konflikte të reja.
“Kurti dëshiron të dëbojë popullin serb, nuk dëshiron të flasë, dëshiron të krijojë kriza të reja”, thekson Petkoviq.
Petkoviq ka thënë se ka frikë se si do të zhvillohet situata në Kosovë tash e tutje.
“Borrell tha se është i shqetësuar se në veri të Kosovës rrugët janë të hapura për kriza të reja. Nuk kemi pothuajse asnjë normalizim të marrëdhënieve, as bisedime për normalizim të tyre. Pala prishtinase mohon gjithçka që është rënë dakord për Asociacionin dhe flasim për katër marrëveshje”, thotë Petkoviq.
Tutje ai ka thënë se Kurti nuk ka të drejtë të propozojë verzionin e tij të draft-statutit.
“Kurti nuk ka të drejtë të propozojë versionin e tij të draft-statutit. Ekipi menaxhues është i autorizuar për këtë,” thotë Petkoviq për RTS.
