Nënkryetari i LDK-së, Lutfi Haziri thotë se me miratimin e Deklaratës për të Zhdukurit, Serbisë i është ofruar një lloj amnistie për krimet e luftës.
“Nuk do të thoja barazim, por një lloj amnistie. Po flasim për 1600 persona të zhdukur dhe Kosova ka marrë një obligim që afër 600 persona të komunitetit serb, romë pak dhe disa shqiptarë etnikë që kanë bashkëpunuar me okupatorin që janë në listën e të zhdukurve, të hapë arkivat dhe t’i gjen e të ofron informacion”, ka thënë Haziri.
Sipas tij tani Kosova do të detyrohet të gjejë informacion për arkivat e UÇK-së, edhe pse Haxiri tha se ato nuk kanë ekzistuar.
“Nëse ju kujtohet qytetarëve ajo marrëveshja parimore e ekipit negociator për hapjen e arkivave të UÇK-së si kërkesë e Beogradit që doli se nuk ka arkiva. UÇK-ja nuk ka arkiva sepse nuk ka adminstru me letra gjatë periudhës së luftës. Ka qenë një debat një javë, fatkeqësisht jo më shumë por tani me këtë marrëveshje ne obligohemi me ofru informacione nëse ka informacion ose me ishtrydh njerëzit që dijnë edhe në këto rrethana me ofru informacione”, ka deklaruar Haziri në Info Nata në Tëvë 1.
Sipas tij amnisti i është ofruar Serbisë edhe në marrëveshjen e 18 marsit.
“Arkivat e Kosovës sa jam unë në dijeni, nuk kanë dëshmi nuk kanë të dhëna, krejt ajo arkivë nëse posedon diçka që ka mbet pjesë e luftës çlirimtare është, por nuk ka të dhëna për personat e zhdukur në Kosovë në periudhën që po flasim 1 janar 1998 – 31 dhjetor 2000, sot është konfirmuar në këtë marrëveshje të përbashkët dhe fatkeqësisht kjo lloj amnistie që po i ndodh tash. Edhe në marrëveshjen e 18 marsit të mos paragjykohet statusi politik i Kosovës. Ku ka kryeminstër në botë që thotë nuk e paragjykoj Republikën time, si shtet i pranuar ndërkombëtarisht. Edhe kjo, një lloj barazie apo amnistie që i jepet do t’i sjellë Kosovës problem serioze”, ka deklaruar ish-kryetari i Komunës së Gjilanit.