Presidentja Vjosa Osmani, është deklaruar pas miratimit të Deklaratës për Personat e Zhdukur, në kuadër të dialogut në Bruksel.
Osmani ka shkruar se fati i të zhdukurve me forcë ka qenë prej kohësh një plagë e thellë në shoqërinë tonë.
“Familjet që vazhdojnë të kërkojnë vendndodhjen e të dashurve të tyre, të cilët u zhdukën me forcë nga regjimi i Millosheviqit dhe përmes një sistemi të krimeve të luftës dhe gjenocidit të sponsorizuar nga shteti, kanë mbi dy dekada që mbajnë këtë barrë të rëndë në zemrat dhe në emër të një vendi të tërë”, ka deklaruar ajo.
Osmani ka potencuar se familjarëve që i kërkojnë të afërmit e tyre të zhdukur, u është mohuar në mënyrë çnjerëzore drejtësia dhe paqja për një kohë të gjatë.
“Shpresojmë që Deklarata e rënë dakord sot në Bruksel do të hapë rrugën për njohjen e këtyre krimeve dhe për drejtësinë. Por mbi të gjitha, një moment lehtësimi për familjet që kanë pësuar dhimbje dhe vuajtje të pashpjegueshme”, thuhet në deklaratën e së parës së shtetit.
“Kjo deklaratë do të kërkojë zbatim të menjëhershëm dhe për këtë, siç e dimë nga marrëveshjet e mëparshme, Serbia ka një histori të tmerrshme”, ka shkruar Osmani.