Gazetari Agron Halitaj i cili aktualisht është zëvendëskryeredaktor në televizionin Tëvë1, ka reaguar në lidhje me ikjen e të rinjve nga Kosova.
Përmes një statusi në Facebook ai ka thënë se pushteti edhe shoqëria nuk mund të jenë indiferent ndaj kësaj dukurie.
“Ka prej atyre që thonë: punë e madhe që po ikin rinia- le të shkojnë ku të gjejnë më mirë. Po, të rinjtë dhe jo vetëm ata, po largohen me shpresën se diku tjetër do të gjejnë më mirë se në vendin e tyre, por nuk është se pushteti dhe ne si qytetarë duhet të jemi indiferent dhe të mos shqetësohemi për këtë gjë”, ka shkruar Halitaj në Facebook.
Ai ka përmendur edhe disa nga pasojat me të cilat mund të përballet vendi me ikjen e të rinjve dhe brezit të mesëm.
“Nëse ikin rinia dhe brezi i mesëm zvogëlohet fuqia punëtore. Me zvogëlimin e fuqisë punëtore, bie konsumi dhe ulet prodhimi. Me uljen e prodhimit u rrezikohen vendet e punës edhe atyre që kanë vendosur të jetojnë këtu, për sa kohë që me rënien e konsumit, mbyllen bizneset dhe pakohen mjetet që derdhen në buxhetin e shtetit nëpërmjet tatimeve. Me pakësimin e të hyrave buxhetore, rrezikohen pagat e punëtorëve edhe në sektorin publik. Krahas rrezikimit të pagave dhe të pensioneve, rrezikohet edhe shlyerja e borxheve të jashtme. Në pamundësi të sigurimit të pagave dhe të shlyerjes së borxheve, shteti futet në krizë financiare. E kur shteti futet në krizë, pasojat i ndjejnë krejt ata që jetojnë në këtë vend”, ka shkruar ai.
Sipas tij, krahasimi i largimit nga vendi në këtë kohë me me ikjet gjatë kohës së regjimit serb është i paqëndrueshëm dhe i pavend./teve1.info/