Kryeministri i Kosovës, Albin Kurti do të takohet sot në Bruksel me presidentin e Serbisë, Aleksandar Vuçiq.
Për këtë ka reaguar deputeti i LDK-së, Driton Selmanaj, i cili ka thënë se çfarëdo dokumenti që do trajtohet në Bruksel, duhet që fjalën e fundit për interpretim të të dekretit dhe statutit për asociacionin të këtë Gjykata Kushtetuese.
Sipas tij, nëse nuk ndodh kjo, pasojat për vendin do të jenë të paparashikueshme.
“Çfarëdo dokumenti që do trajtohet në Bruksel, nëse nuk e ka të përfshirë pikën e marrëveshjes së vitit 2015, ku Gjykata Kushtetuese do ta ketë fjalën e fundit për interpretim të dekretit dhe statutit për asociacionin, pasojat për vendin do jenë të paparashikueshme. Pa siguresën që ajo pikë i jep Gjykatës Kushtetuese, dhe përmes saj i jep siguri Kosovës, Albin Kurti do ta rrezikojë rendin juridik, parimin e unitaritetit të shtetit dhe integritetin territorial të Kosovës”, ka shkruar ai në Facebook.
Ndryshe, Kurti ka thënë se në këtë takim, i cili do të ndërmjetësohet nga BE-ja temë diskutimi do të jetë zbatimi i Marrëveshjes së Brukselit dhe aneksit zbatimit të Ohrit.
