Kosova pritet të ketë rritjen më të madhe ekonomike në rajon.
Kjo rritje për këtë vit pritet të jetë 3.7%, sipas raportit të Grupit të Bankës Botërore.
Sipas ekonomistit Jakup Bellaqa, kjo nuk është e mjaftueshme.
“Është e mirëseardhur, por nuk është e mjaftueshme, mirëpo këtu do të thotë që ambienti për biznes është përmirësuar sepse sundimi i ligjit që është standardi i parë në ekonomi është përmirësuar sepse është luftuar korrupsioni më shumë. Duhet me përshëndetë por nuk duhet harruar se jemi me bruto produktin vendor si ekonomi më e vogël se sa vendet e rajonit”, vlerësoi Bellaqa.
Ndërkaq profesori i ekonomisë, Mustafë Kadriaj, mendon se pavarësisht rritjes ekonomike, nuk mund të flitet për zhvillim ekonomik.
Këtë ai e bazon kur krahason raportin e Bankës Botërore me atë të Fondit Monetar Ndërkombëtar.
“Raporti i FMN-së e ka paraqitur Kosovën jashtëzakonisht keq tek pjesa e zhvillimit ekonomik, por FMN e ka fokusin më shumë tek mirëqenia e qytetarit, pra këtu mund të themi që kemi rritje ekonomike, por nuk kemi zhvillim ekonomik, pra mirëqenia e qytetarit jo që është më mirë por është më keq në krahasim me vitet tjera”, tha Kadrijaj.
Sipas Bankës Botërore, nxitës të zhvillimit ekonomik pritet të jenë kryesisht konsumi privat, eksportet por edhe investimet publike.
Ndërkaq prodhimi i brendshëm bruto i Ballkanit Perëndimor si tërësi parashihet të shënojë rritje mesatare prej 2.6%.
Kronika e gazetares Albiona Hajdari.
