Donjeta Demolli nga Partia Socialdemokrate ka folur për fenomenin e ikjes së punëtorëve shëndetësorë nga Kosova.
Sipas saj, në Kosovë aktualisht 400 punëtorë shëndetësorë janë të papunë dhe ky sistem është jashtë interesimit të Qeverisë.
“Është e vërtetë që ky është një problem kompleks dhe ka rrënjë edhe më herët, edhe para Qeverisë Kurti. Por në anën tjetër ne nuk kemi parë reagim serioz ndaj këtij fenomeni. I kemi punëtorët shëndetësorë të cilët po ikin për çdo ditë, i kemi anesteziologët pa të cilët është e pamundur funksionimi i shëndetësisë në QKUK dhe spitale dhe i kemi 400 punëtorë shëndetësorë të cilët janë të papunë. Ky sistem është totalisht jashtë kontrollit, jashtë interesimit të Qeverisë edhe për këtë arsye e kemi këtë gjendje ashtu siç është”, ka thënë Demolli në Ditari në Tëvë 1.
Demolli thotë se mosinteresimin e Qeverisë për punëtorët e tregon edhe shkrirja e Ministrisë së Punës dhe Mirëqenies Sociale në Ministri të Financave.
“Mandej kur fillon trendi, kur dikush ikë është edhe një si domino-efekt që një punëtor e tërheq punëtorin tjetër, mandej e merr edhe efektin e trendit. Mirëpo që në fillim që në nismën e kësaj Qeverie ne e kemi parë orientimin e kësaj Qeverie. Ministria e Punës dhe Mirëqenies Sociale është fuzionuar në Ministrinë e Financave. Prej mirëqenies, prej idesë së ofrimit të një standardi tjetër të jetesës, të një jete më të dinjitetshme, të të drejtave e barazisë ka kaluar në shpërndarje të triskave, bonave”, ka deklaruar ajo.
“Fuzionimi e tregon orientimin, qasjen e Qeverisjes, filozofinë e punës së kësaj qeverisje. E kemi parë që kjo Qeveri nuk është angazhuar në asnjë moment për ta rritur taksën në dividendë, për ta rritur taksën në korporata. 160 milionë euro janë largu nga Kosova vitin e kaluar nga banka. Ky është fitim i pastër i bankave të cilët për shkak që kanë pronarë të huaj i kanë larguar ato para nga Kosova”, ka shtuar Demolli. /teve1.info/