Donjeta Demolli nga Partia Socialdemokrate vlerëson se Qeveria Kurti ka ndryshuar qasje ndaj klasës punëtore.
“Është mirë të rikthehemi prapa, para se kjo parti (Vetëvendosje) ta marrë pushtetin dhe të kuptojmë se në të kaluarën sindikatat e punëtorëve, punëtorët e Kosovës ishin adresa dhe targeti kryesor i artikulimit politik dhe qasjeve të kësaj partie, duke u afruar me punëtorët, duke folur për kërkesat e tyre”, ka thënë Demolli.
Sipas saj, pasi që Qeveria Kurti e mori mandatin, përpos që i neglizhoi kërkesat e punëtorëve, po ashtu tentoi që të ketë qasje shtypëse e përçarëse ndaj sindikatave.
“Pasi e mori mandatin, i harroi ata dhe për të mos qenë e mjaftueshme kjo i sulmoi dhe denigroi edhe udhëheqësit e sindikatave, edhe nevojat dhe kërkesat e punëtorëve në përgjithësi, duke i paraqitur punëtorët sikur kërkesat e tyre janë të ekzagjeruara dhe ne sot e kemi një gjendje ku rreth 100 mijë punëtorë punojnë me pagë minimale që është 170 euro, paga e cila ende nuk është rritur prej 2011. Kemi punëtorë që punojnë në kushte të vështira, edhe vikendeve, punojnë me vegla të pamjaftueshme dhe e kemi një Qeveri e cila është totalisht injoruese dhe neglizhente ndaj kërkesave dhe nevojave të tyre. Përpos që i neglizhon kërkesat e tyre, tenton në vazhdimësi që ta ketë një qasje shtypëse e përçarëse”, ka thënë Demolli në Ditari në Tëvë 1.
Demolli shton se kjo ilustrohet me reagimin e kësaj Qeverie në kohën kur punëtorët e arsimit kërkonin shtesa gjatë pandemisë.
“E kemi përvojën e organizimit të arsimtarëve të sektorit të arsimit për shtesat që i kërkonin gjatë kohës së pandemisë dhe e kemi parë përgjigjen e kryeminstrit dhe Qeverisë ndaj tyre, se si ata tentuan ta politizonin totalisht, ta asoconin grevën e punëtorëve të arsimit me partitë paraprake, edhe pse ne e dimë që punëtorët arsimorë kanë protestuar në vazhdimësi”, ka deklaruar Demolli.
Partia Socialdemokrate përmes një aksioni simbolik sot kanë akuzuar Qeverinë e Kosovës se nuk po punon për mirëqenien e punëtorëve.
Në ditën e punëtorëve, PSD vendosi para objektit të ekzekutivit një çadër plazhi, një ulëse dhe mbishkrimin “Jemi në pushim vjetor 365 ditë” cila sipas tyre tregon se qeveria është në pushim.