Kryetari i Aleancës për Ardhmërinë e Kosovës, Ramush Haradinaj ka kujtuar rënien heroike të komandantit Ilaz Kodra dhe njëzetenëntë bashkëluftëtarëve të tij më 30 prill 1999.
Haradinaj ka thënë lufta e tyre kundër disa brigadave të ushtrisë serbe ktheu rrjedhën e historisë në favor të Kosovës.
“Sot përkujtojmë 24 vjetorin e sakrificës heroike të komandantit Ilaz Kodra dhe njëzetenëntë bashkëluftëtarëve të tij. Më 30 prill 1999, ata luftuan trimërisht kundër disa brigadave të ushtrisë pushtuese jugosllave, duke e kthyer rrjedhën e historisë në favor të lirisë së Kosovës. Derisa kujtojmë trashëgiminë e komandantit Ilaz Kodra dhe Brigadës 114 “Fehmi Lladrovci”, vlerësojmë lart sakrificën e tyre në mbrojtje të popullatës së paarmatosur. Qëndresa e tyre mishëron vetë thelbin e qëndresës shqiptare – të fortë përballë vështirësive dhe duke luftuar për lirinë e Atdheut tonë të shtrenjtë”, ka shkruar Haradinaj.
Në 24 vjetorin e rënies heroike të komandantit Ilaz Kodra, homazhe në Marinë ka bërë edhe kryeministri i Kosovës, Albin Kurti ndërsa, kryetari i PDK-së Memli Krasniqi ka vizituar familjen Kodra./teve1.info/