Ambasadorja gjermane në Serbi, Anke Konrad, ka përcjellë qëndrimin e Gjermanisë se është për keqardhje që Lista Serbe bojkotoi zgjedhjet e fundit të cilat u mbajtën në katër komunat me shumicë serbe.
“Serbët e Kosovës, të cilët u larguan nga institucionet e Kosovës në nëntor të vitit 2022, duhet t’u kthehen atyre sa më shpejt. Kjo, ra fjala, është edhe një nga obligimet nga Marrëveshja e Brukselit, siç është edhe obligimi për formimin e Asociacionit të Komunave me shumicë serbe. Dhe po, Asociacioni tani duhet të zbatohet shpejt, ne jemi të vendosur për këtë”, tha Konrad për Kurir.
Ajo shtoi se Asociacioni i Komunave me shumicë serbe është “obligimi kryesor i Kosovës në këtë dialog” dhe se parakushtet për të duhet të krijohen pa vonesa, por edhe që Serbia duhet të zbatojë të gjitha obligimet e saj, transmeton teve1.info.
Ambasadorja shtoi se marrëveshja evropiane për rrugën e normalizimit të marrëdhënieve ndërmjet Kosovës dhe Serbisë, e ashtuquajtura marrëveshja franko-gjermane, është pranuar nga të dyja palët dhe se tani e kanë obligim ta zbatojnë pa diskutim dhe pa kushte të reja.
“Të dyja palët do të përfitojnë konkretisht nga zbatimi i marrëveshjes, sepse tensionet aktuale janë helm për të ardhmen e njerëzve, për investimet ekonomike dhe vendet e punës dhe pa normalizimin e marrëdhënieve nuk do të ketë anëtarësim në BE”, tha Konrad.
