Vendimin e Kuvendit Komunal të Mitrovicës për hapjen e Urës së Ibrit e ka përkrahur sonte Qeveria e Kosovës.
Në një përgjigje me shkrim për RTK-në, Qeveria thekson se paragrafi i parë i nenit 35 të Kushtetutës garanton lëvizjen e lirë të qytetarëve në Republikën e Kosovës në çdo vendbanim.
“Çfarëdo pengese në lirinë e lëvizjes cenon këtë të drejtë themelore. Prandaj edhe vendimi për heqjen e pengesave të tilla është veprim i drejtë dhe i duhur”.
Ndërsa misioni i KFOR-it ka thënë rihapja e Urës së Ibrit për qarkullim të makinave është një problematikë që duhet të zgjidhet përmes dialogut politik.
Në një përgjigje për teve1.info thuhet se Misioni i NATO-s, KFOR, vazhdon të monitoroj zhvillimet lokale dhe qëndron plotësisht i fokusuar në implementimin ditor të mandatit të tij, bazuar në Rezolutën e Këshillit të Sigurimit 1244 e vitit 1999.
“Rihapja e urës është një çështje që duhet të zgjidhet përmes dialogut politik. Misioni i NATO-s, KFOR, vazhdon të monitoroj zhvillimet lokale dhe qëndron plotësisht i fokusuar në implementimin ditor të mandatit të tij, bazuar në Rezolutën e Këshillit të Sigurimit 1244 e vitit 1999, për të siguruar një ambient të sigurt dhe lëvizje të lirë për të gjitha komunitetet në Kosovë” thuhet në përgjigje.
Ky qëndrim i KFOR-it vjen pasi në Kuvendi Komunal i Mitrovicës së Veriut të premten ka vendosur për hapjen e urës mbi lumin Ibër për qarkullim të automjeteve dhe lëvizje të lirë.
Ndryshe, asambleistja e Vetëvendosjes në Komunën e Mitrovicës së Veriut, Aida Doli në emisionin “DITARI” në Tëvë1 tha se kjo ka qenë kërkesë e qytetarëve dhe është votuar në kuvend komunal.
“Kjo kërkesë është e qytetareve të veriut të Mitrovicës, e kamotshme, e cila na është adresuar neve në Kuvend. Unë kam propozuar që të futet si pikë në rend të ditës, ku ka marr edhe mbështetjen e shumicës. Kjo do të jetë më e lehtë për liri të lëvizjes së qytetarëve, pasi urat bashkojnë dhe nuk ndajnë”, tha Doli.
