Samardo Samuels ka akuzuar skuadrën e KB Bashkimit se nuk është paguar tash e katër muaj.
Samuels ishte një prej lojtarëve më të mirë te skuadra prizrenase, ndërsa ishte prezantuar në mënyrë të veçantë.
Ai të shtunën ka shkruar në llogarinë e tij në Instagram.
“Dua ta falënderoj KB Bashkimin për mundësinë e dhënë për të luajtur basketboll dhe për ta mbyllur sezonin. Ky sezon ka qenë i mbushur me shumë befasi. Befasia më e madhe ka qenë fakti se ekipi nuk ka qenë në gjendje ta paguajë pagën për të cilën jemi pajtuar në kontratë. Janë bërë katër muaj tashmë. Është turp i vërtetë”, ka shkruar Samuels.
Qendra Samuels te skuadra e Bashkimit ka pasur mesatare prej 12.2 pikëve, 2.3 kërcimeve dhe 1.7 asistimeve për ndeshje në këtë edicion të elitës së basketbollit të Kosovës.
Skuadra e Bashkimit nuk ka publikuar ndonjë reagim në lidhje me këtë akuzë.