Drejtori Ekzekutiv i “Fondit për të Drejtën Humanitare” Bekim Blakaj ka thënë se Serbia asnjëherë nuk ka pasur vullnet politik që të ofrojë informacione për personat e zhdukur me dhunë gjatë luftës në Kosovë.
Blakaj madje tha se një gjë të tillë Serbia nuk do ta bëjë edhe nëse finalizohet si hap i fundit deklarata e të pagjeturve në takimin e 2 majit mes kryeministrit të Kosovës, Albin Kurti dhe presidentit serb, Aleksandar Vuçiq.
“Serbia do bëjë çmos që mos ta zbatojë edhe këtë deklaratë… Është e vërtetë në të kaluarën gjithashtu ka pasur zotime, gjithashtu ka pasur deklarata de facto, kanë qenë deklarata… po palët kanë rënë dakord edhe në të kaluarën që këtë çështje ta trajtojnë si çështje humanitare, mirëpo ne nuk e kemi pa në praktikë që ka ndodhë kështu “, tha ai.
Madje Blakaj në emisionin “Këndi i Debatit” në Tëvë1, tha se Serbia ka pasur informacione për vendndodhjen e varrezave masive që janë zbuluar vite më herët, por që sipas tij, thjeshtë ajo nuk ka pasur asnjëherë vullnet politik për zgjidhjen e kësaj çështje.
“Çështja është që Serbia padyshim që ka pasur informacione të sakta për vendndodhjen e varrezave masive që janë zbuluar disa vite më herët. Për varrezën në Rudnicë ajo nuk është larg nga një kazermë ushtarake, a mundeni me paramendu që dikush ka mundur afër një kazerme ushtarake me i varros së paku 52 persona dhe mos me ditë institucionet. Pra thjeshtë nuk ka pasur vullnet politik që të ofrojë informacione”, shtoi ai./teve1.info./
