Nuk e pa asnjëherë babain e saj.
Krenare Kamberi, u lind vetëm disa orë para se babai, Gëzimi të vritej nga forcat serbe në Masakrën e Mejës në vitin 1999.
Nën emocione, 24-vjeçarja rrëfen për mallin që ka për babain dhe katër axhallarët që mbetën të vrarë atë ditë.
“Në të njëjtën ditë në orët e hershme të mëngjesit vij në jetë unë, ndodh rastësia që pak orë më vonë babi mbetët i vrarë dhe kështu nuk e njoh asnjëherë babin… Unë jam rritë duke menduar babin si në këtë foto edhe e vetmja fytyrë që njoh është kjo çdo vit vijmë për ta përkujtua babin edhe katër axhët”, tha Krenare e Kamberi.
Ajo ka edhe një lutje për të gjitha institucionet e vendit.
“Unë i bëj lutje që të gjenden sa më shpejt edhe baballarët e të gjithë shokëve dhe shoqeve të mija që ende kërkojnë të vijnë në varrezat e prindërve të tyre… Që 24 vite marrim info dhe premtime që kjo ka me ndodhë sa më shpejt po qe hala nuk është realizuar”, shtoi ajo.
E një 4-vjeçar që ka trashëguar emrin e gjyshit të tij të masakruar, vjen çdo 27 prill në kompleksin memorial.
Kurse, Astrit Dushmani i ka ende të freskëta kujtimet për prindin e tij të masakruar, teksa thotë se është i dëshpëruar me përkujtimin që i bëhet atyre.
Edhe Lush Krasniqi që i ka dy vëllezër të vrarë në këtë tragjedi, shpreh zhgënjimin e tij ndaj institucioneve.
Teksa, një tjetër familjar thotë se është krenar për veprën e tyre.
Në këtë datë u vranë 376 persona, dhe se kjo është ndër masakrat më të mëdha në luftën e Kosovës.
Kronika e gazetarit Lindrit Zejnullahu.