Më 27 prill 1999 në Mejë të Gjakovës u vranë 376 civilë shqiptarë nga forcat e regjimit serb.
Në 24-vjetorin e kësaj masakre, familjarë, qytetarë e krerë institucional nga opozita dhe pushteti bënë homazhe në këtë kompleks memorial.
Nga aty, kryeministrti Albin Kurti tha se krimi në Mejë u bë në mënyrën më mizore.
E kryeparlamentari, Glauk Konjufca u shpreh se nuk do ndalen asnjëherë së kërkuari drejtësi për të gjithë ata që u vranë mizorisht nga shteti i Serbisë.
Kurse, krerët e opozitarë thanë që pa u zbardhur fati i të zhdukurit të fundit nuk mund të ketë drejtësi.
“Si çdo 27 prill, sa herë që vijmë këtu në Mejë, në lëndinën e dhembjes por edhe në lëndinën e krenarisë, nuk ka se si të mos kujtojmë atë rrugëtim të rëndë dhe të vështirë të popullit tonë që dha dhe sakrifikoi aq shumë për lirinë që e gëzojmë sot. Si në çdo ditë tjetër, por ne mënyre të veçantë kur i kujtojmë të pagjeturit, dhimbjen e pambaruar të familjarëve tanë por të kombit tonë në përgjithësi, nuk ka se si mos mendojmë që nuk është bërë mjaftueshëm. Sa prej familjeve kosovare, liria realisht nuk ka ardhur. Pa u gjetur dhe pa u zbardhur fati i të zhdukurit të fundit, nuk mund të ketë drejtësi”, tha kryetari i PDK-së Memli Krasniqi.
“Sot me përulësi nderojmë memorialin për Mejë, ku pushojnë trupat, shpirtrat e shqiptarëve të pafajshëm. Gjithë këta janë vrarë, e vërtetë pa arsyeje dhe pa asnjë të drejtë, civilë janë ndarë nga familjet e tyre. Një pjesë e trupave të tyre janë marrë në Serbi edhe sot ka ende të pagjetur. Kjo është tragjedia më e madhe; masakra më e madhe në Kosovë. Janë 377 të vrarë, të gjitha moshave, po ashtu të dy gjinive dhe dy besimeve”, deklaroi lideri i AAK-së, Ramush Haradinaj.
Ndërkohë edhe Lidhja Demokratike e Kosovës përmes një postimi në rrjetin social facebook ka thënë se bllokimi i korridoreve të 15 fshatrave, për të grumbulluar sa më shumë burra që ishin të moshave 15 deri në 60 vjeç, kishte qëllimin e qartë, ekzekutimin e tyre në prani të familjarëve.
Kronika e gazetares Lindrit Zejnullahu.
https://www.youtube.com/watch?v=2bNqSpDPSVI