Zëvendësministrja e Arsimit, Edona Maloku deklaroi se si Ministri veçse kanë filluar me politikën e re të futjes së këshilltarëve të karrierës dhe rritjen e numrit të tyre në shkolla.
Sepse sipas saj, në këtë mënyrë forcohet drejtimi dhe përvoja e fëmijëve me fushat e shkencës dhe teknologjisë.
“Jemi duke rritur fëmijë të cilët janë të njohur si ata që lindin dhe rriten me teknologjinë dhe në erën digjitale. Kështu që në këtë kuptim natyrisht që edhe në sistemin parauniversitar parashohim mekanizma se si të forcohet kjo në mënyrë që drejtimi dhe përvoja e tyre me këto lloje të fushave të jetë sa më i fortë dhe të jetë sa më e hershme. Për shembull ne veçse tani kemi politikë të re që të fusim edhe këshilltarë të karrierës, e kemi rritur numrin e tyre në shkolla dhe kjo është një ndër funksionet e shumta…”, tha Maloku.
Tutje ajo në emisionin “Ditari” tha se ideja e këshilltarëve të karrierës në shkollat e vendit është që ata të punojnë në grupe me fëmijët në mënyrë që t’u ofrohet mundësia e mbështetjes edhe për fushat STEM, e siç tha ajo, në veçanti për vajzat.
“Po tani ideja është që këta të bëjne pikërisht këtë lloj këshillimi për karrierë në grupe të ndryshme. Ata janë potencial i shkollës, janë resurs i shkollës, dhe ideja është që këtu pastaj mundësia e ofrimit të mbështetjes edhe për fushat STEM, sidomos për vajzat me qenë njëra ndër rolet ose funksionet që ata bëjnë. Në këtë kuptim jemi duke punuar në shumë nivele që intervenimet të jenë të tilla që i ndihmojnë vajzat dhe gratë të zgjojnë interesimin e tyre në këto fusha “, shtoi ajo./teve1.info./
