Policia e Kosovës ka arrestuar sot dy të dyshuar për kryerjen e veprës penale “dhënie e ryshfetit” dhe “keqpërdorim i pozitës apo autoritetit zyrtar”.
Sipas njoftimit,bëhet e ditur se i dyshuari A.R., shtetas i Maqedonisë së Veriut, kishte paguar dhjetë mijë euro një të dyshuari tjetër në komunën e Vitisë, në këmbim të regjistrimit të tij si shtetas i Kosovës.
“Pas një pune intensive hetimore nga ana e njësisë së Drejtorisë për Hetimin e Krimeve Ekonomike dhe Korrupsionit (DHKEK) – Gjilan, është zbuluar se i dyshuari mashkull me iniciale A. R. viti i lindjes 1978, shtetas i Maqedonisë së Veriut, në këmbim të regjistrimit të tij si shtetas i Republikës së Kosovës në Komunën e Vitisë, kishte paguar shumën prej 10000,00 (dhjetë mijë euro) përmes një të dyshuari tjetër i cili ndodhet në kërkim policor, me qëllim të regjistrimit të tij në sistemin elektronik të gjendjes civile, duke u pajisur kështu me dokumente personale si: certifikatë, ekstrakt të lindjes dhe letërnjoftim nga ana e të dyshuarit mashkull kosovar me inicialet M. D. viti i lindjes 1962”, thuhet në njoftim.
Tutje theksohet se lidhur me rastin, personat e dyshuar të identifikuar janë intervistuar, ku ndaj të dyshuarit të parë është iniciuar rasti “dhënie e ryshfetit” si dhe i është sekuestruar letërnjoftimi i Kosovës, e po ashtu i është anuluar regjistrimi nga Drejtoria e Administratës/Sektori i Gjendjes Civile, Viti.
Ndërsa ndaj të dyshuarit të dytë i cili ka kryer shërbimin e regjistrimit të kundërligjshëm të të dyshuarit të parë. është iniciuar rasti “keqpërdorim i pozitës apo autoritetit zyrtar” dhe pas aktvendimit të prokurorit kompetent mbi ndalim, që të dy janë dërguar në mbajtje për 48 orë. /Teve1.info/