Pushteti dhe opozita janë bërë gati për të diskutuar për temën më të komentuar të ditëve të fundit: atë që po ndodhë në Korporatën Energjetike të Kosovës.
Arrestimi i Kryeshefit të KEK-ut, po komentohet me tone të larta dhe akuza ndaj njëri-tjetrit në seancën e jashtëzakonshme të së mërkurës.
72 milionë po thotë shefi i deputetëve të PDK-së, Abelard Tahiri, i ka vjedhur qeveria aktuale në tenderët e KEK-ut.
“Për pesë muaj KEK ka nënshkruar në vlerë prej 72 milionë euro 30 kontrata njëburimore të Nagip Krasniqit, i cili sot besoj se është me plot të drejtë në paraburgim”, u shpreh Tahiri.
Akuza e Tahirit ngjalli një reagim të menjëhershëm nga Mimoza Kusari – Lila.
“Opozita po mundohet të shfrytëzojë mekanizmin në të cilin ende e kanë ndikimin e tyre, atë të prokurorisë, duke kthyer sallën e Kuvendit në gjykatore…në i propozoj opozitës që ta bëjnë edhe një mocion sot dhe nga qendra e paraburgimit ku po mbahet zotëri Nagip Krasniqi të sillet këtu, në sallën e Kuvendit, ashtu duar lidhur siç e nxorën nga gjykata”, deklaroi ajo.
Akuzat vazhduan edhe nga akterë të tjerë opozitarë.
Ramush Haradinaj akuzoi Albin Kurtin se është shef i të korruptuarve nëpër institucionet e Kosovës.
“Po flasim për një model të veçantë, modeli i korrupsionit të Lëvizjes Vetëvendosje njihet dhe quhet lidhje e shkurt korruptive…Ju mundeni me thënë që Albin Kurti nuk është i korruptuar, ai është shefi i të korruptuarve, krijuesi i modelit të korrupsionit, lidhja e shkurt-dostat”, tha Haradinaj.
Ndërkohë deputeti i Lidhjes Demokratike të Kosovës, Driton Selmanaj nënvizoi se hetimi penal ndaj ish-kryeshefit Krasniqi për keqpërdorim të detyrës nuk duhet të ndalet.
“Presin që ky hetim penal mos të ndalet deri sa të zbardhet e vërteta, deri në detajet e fundit, përfshirë edhe rolin e ambasadorit Martin Berishaj, ministres së Ekonomisë dhe kryeministrit Kurti në gjithë këtë proces”, tha ai.
Derisa ministrja Artane Rizvanolli thotë se ndjehet e habitur se pse deputetëve të opozitës po u interesojnë kaq shumë tenderët.
“Kur u shpall tenderi, kush e fitoi pse e fitoi firma x pse jo tjetra. Desha t’iu pyes se pse ju i dini në kaq detaje këto informata dhe i përcjellin me kaq sukses. Por, nuk dua, pasi unë këtu kam jetuar ju njoh dhe qytetarët ju njohin, andaj nuk ka nevojë për përgjigje këtu”, deklaroi ministrja Rizvanolli.
Dyshime për korrupsion në KEK, përplasën mes vete deputetin e Vetëvendosjes, Armend Muja, me atë të PDK-së, Ferat Shala.
U përmendën kullotjet, gropat, burgu dhe picat.
“Në këtë gropë kanë kullotur shumë grupe të interesit. Ky është problemi dhe me neve nuk ka ndodh kjo, prandaj ndërmarrja ka filluar të lulëzojë”, tha Muja.
“Me këtë nuk replikoj, pasi kam nevojë të replikojë me kolegun tim Bekim Haxhiu, i cili kur është arrestuar ia ka dërguar një picë në stacionin policor pasha besën, duke lypur pare për të akredituar universitetet publike. Prandaj, kam replikë me Bekimin që ta pru picën në stacion të policisë dhe të ka nxjerrë prej burgut për korrupsion”, u shpreh Shala.
Për të njëjtën temë, diskutime të ashpra patën edhe ata që dikur ishin kolegë partie.
Haki Abazi dhe Sali Zyba, hodhën akuza ndaj njëri-tjetrit, derisa u përdorë edhe gjuhë jo-parlamentare.
Madje deputeti Abazi hodhi akuza në drejtim të partisë që dikur bënte pjese edhe për një çështje tjetër.
Kurse, ministri i financave në fjalën e tij e quajti seancën një spektakël për të tërheq vëmendjen siç tha ai, nga sukseset e qeverisë.
Kronika e gazetarit Arton Rama.
