Deputeti i LDK-së, Driton Selmanaj ka kërkuar shkarkimin e bordit të KEK-ut.
Ai tha se është i bindur se Krasniqi nuk ka qenë i vetëm në këto aktivitete “shumëmilionëshe dhe ta paligjshme”.
“Arsyeja pse LDK është bërë pjesë e kësaj seancë të jashtëzakonshme ka të bëjë me logjikën kleptokratike, abuzuese dhe korruptive që Qeveria Kurti ka karshi ndërmarrjeve publike dhe në rastin konkret ndaj KEK-ut si ndërmarrje vitale për shtetin e Kosovës. LDK vlerëson se të gjithë ne dhe qytetarët duhet të përshëndesin çdo aksion të Policisë së Kosovës dhe organeve që kanë qëllim t’i luftojnë rastet korruptive dhe aktivitetet kriminale. Jam i bindur se Krasniqi nuk ka qenë i vetëm në këto aktivitete shumëmilionëshe dhe ta paligjshme. Në rastin konkret, përgjegjësia penale është e pamjaftueshme. Shkarkimi i bordit të KEK-ut është më e pakta që mund të ndodhë urgjentisht”.
Ai tha se LDK në vazhdimësi ka ngritur shqetësime për keqmenaxhime në këtë korporate, që nga mënyra se si kjo Qeveri dhe KEK-u si dhe institucionet tjera kanë menaxhuar krizën energjetike në periudhën 2021-2022.
“Qasja e Qeverisë Kurti ndaj KEK ka qenë e papranueshme, që nga kapja e kësaj ndërmarrje nga aktivistet dhe funksionaret e VV-së.LDK në vazhdimësi ka ngritur shqetësime për keqmenaxhime në këtë korporate, që nga mënyra se si kjo Qeveri dhe KEK-u dhe institucionet tjera kanë menaxhuar krizën energjetike në periudhën 2021-2022, shtrenjtimin e lartë të faktuarave të energjisë, mënyrën e subvencionimit, punësimet masive të familjarëve dhe aktivistëve e që për pasojë të presionit të madh vetëm një ditë pas themelimit të Komisionit Hetimor bëhet anulimi i konkursit për plotësimi të 150 pozitave”.