Ka nisur debati parlamentar lidhur me zhvillimet në Korporatën Energjetike të Kosovës dhe përgjegjësinë e institucioneve qendrore në sektorin energjetik.
Deputeti i PDK-së, Ferat Shala fillimisht tha se është e papranueshme vonesa e Bordit të Drejtorëve për ta pezulluar nga detyra Nagip Krasniqin.
“Ne deputetët propozues të këtij debati e konsiderojmë të papranueshëm faktin që Bordi i Drejtorëve si organi më i lartë drejtues i ndërmarrjes ka reaguar me vonesë në pezullimin e zotit Krasniqi i cili tashmë është i arrestuar. Rrjedhimisht çfarëdo mosveprimi dhe mosdistancimi nga z.Krasniqi, bordi i drejtorëve dhe Qeveria janë po aq përgjegjës për një rast të tillë për të cilën drejtori i KEK-ut është arrestuar për shkak të dyshimit që ka kryer veprat ‘keqpërdorim i pozitës dhe autoritetit zyrtar’, ‘ushtrim ndikimi’ dhe ‘konflikt interesi’”, ka thënë Ferati.
Madje sipas tij edhe U.D i caktuar dje, Përparim Kabashi, është i dyshuar për vepra penale në dëm të KEK-ut.
“Po ashtu Bordi i Drejtorëve dhe Qeveria dje bën shkeljen e radhës duke e emëruar ushtrues detyre të drejtorit të KEK-ut, Përparim Kabashin, i cili gjithashtu rezulton të jetë i dyshuar për vepra penale në dëm të ndërmarrjes KEK”, tha Ferati.
Ai shtoi se kjo parti qysh më herët kishte ngritur shqetësime për zhvillimet në KEK dhe lidhjet sipas tij të grupeve të interesit që operojnë në sektorin energjetik, me kryeministrin Kurti.
“Jemi të gatshëm të debatojmë dhe për të propozuar masa konkrete në funksion të evitimit të pasojave të pariparueshme ndaj interesit shtetëror dhe atij publik…Ne sot jemi të shtyrë të debatojmë për një temë si pasojë e aferave tash të njohura dhe të faktuara publikisht si afera korruptive në KEK…Që në fillim kemi ngritur shqetësimet tona serioze për politikat që po ndjek kjo Qeveri në raport me sektorin energjetik, kemi ngritur shqetësimet për politikat që ka ndjekur ndaj resurseve minerare të thëngjillit, kemi ngritur shqetësimet për tregtinë me energjinë, për rrjetet dhe grupet e interesit që operojnë brenda dhe jashtë vendit në sektorin energjetik, lidhjet me VV-në dhe direkt me kryeministrin Kurti”, tha Shala.
