Ditën e katërt të muajit të parë të vitit 2023, Policia e Kosovës hapi konkurs për pranimin e zyrtarëve policorë sipas kushteve të parapara të konkurrimit për të gjitha minoritetet në Drejtorinë Rajonale të Policisë në Mitrovicën e Veriut.
Fiks pas dhjetë ditë, ftesë minoriteteve për aplikim në gjuhën serbe i bëri shefi i qeverisë, Albin Kurti.
Por, sërish duket që nuk pati interesim.
Andaj, afati për paraqitjen e aplikacioneve u vazhdua për dhjetë ditë.
Megjithatë sërish nuk pati interesim.
Prandaj, me datën 18 prill erdhi thirrja e dytë për aplikim.
Kësaj radhe anëtari i Komisionit për Siguri, Mefail Bajqinovci është optimist se kësaj here do të ketë interesim për aplikim nga komunitetet.
Sipas tij, nuk do të jetë e nevojshme një marrëveshje politike për rikthimin e tyre në institucione, pasi siç thotë ai, praktika të tilla kanë ndodhur gjatë viteve të kaluara.
Por, deputeti opozitar i këtij komisioni vlerëson se nuk do të ketë aplikime për shkak të presionit nga Serbia, dhe se këtë do ta përdor në takimin e 2 majit presidenti serb, Vuçiq.
Televizioni ka tentuar të marrë një qëndrim për këtë çështje edhe nga Policia e Kosovës mirëpo këta të fundit kanë thënë që procesi është i mbyllur duke mos pranuar të japin detaje rreth konkursit.
Deri te dorëheqja e tyre kishte ardhur pasi ish-drejtori rajonal i Policisë në Mitrovicën Veriore u suspendua për shkak se doli haptas kundër vendimit të Qeverisë së Kosovës për konvertimin e targave ilegale.
Kronika e gazetarit Lindrit Zejnullahu.
