Deputeti i Lëvizjes Vetëvendosje, Armend Muja, ka folur lidhur me tërheqjen e Aleksandër Jabllanoviqit nga garat zgjedhore në veri.
Muja bëri të ditur se vetë Jabllanoviq dhe votuesit e tij, kanë qenë nën presion dhe shantazh të vazhdueshëm, madje sipas tij, djegiet e veturave kanë qenë sinjal për të.
“Unë e di që Jabllanoviq ka qenë në presion. Ai dhe votuesit e tij kanë qenë nën presion dhe shantazh të vazhdueshëm. Boshti i votuesve të tij ka rrezikuar që në momentin e kalimit të kufirit të Serbisë, t’i nënshtrohen formave të ndryshme të arrestimit. Djegiet e veturave kanë qenë sinjal për të. Në veri na është thënë që zgjedhjet duhet të shtyhen, kemi rënë dakord. Pastaj na është thënë që zgjedhjet nuk mund të organizohen, por ato u organizuan. Tani po thuhet që kryetarët nuk mund të shkojnë në veri, mirëpo un besoj që të gjitha do të kompletohen, kryetarët do të shkojnë të qeverisin atje”, deklaroi Muja në emisionin “Këndi i Debatit”.
Madje, Muja vlerësoi se flamuri i Kosovës tanimë do të ngulitet në ndërtesat e qeverisjeve komunale.
Muja deklaroi se ky proces zgjedhor, ka qenë fillimi i fundit të politikës kriminale të Listës Serbe në Kosovë.
“Lista Serbe është përgjegjëse për kriminalizimin e jetës politike në veri të vendit dhe për influencën e dëmshme që e kanë pasur në Kosovë”, shtoi tutje Muja në Tëvë1.
